Tekið af mbl.is
Ewan McGregor hefur nú skipt um hest í miðri á í bókstaflegri merkingu, því að Star Wars-kappinn ætlar að fara yfir til Moto Guzzi-mótorhjólaframleiðandans fyrir næsta ævintýri sitt sem verður suður eftir Suður-Ameríku.
Ítalski framleiðandinn ætlar að styrkja hann til verksins en ekki liggur fyrir hvort ferðafélagi hans í Long Way Round- og Long Way Down-ferðunum, Charley Boorman, muni fara með honum í þetta sinn. Ewan hefur látið hafa eftir sér að hann hafi alltaf dreymt um þessa ferð. „Mig langar að skoða Baja-eyðimörkina. Ég hef aldrei komið þangað en ég þekki marga mótorhjólamenn sem hafa keyrt þarna og þeir segja frá góðum vegum, bæði á möl og malbiki,“ sagði Ewan í myndbandi frá Moto Guzzi. Ferðin sem hann ætlar í verður um 11.000 km frá Suður-Kaliforníu til Tierra del Fuego í Síle og hjólið verður Stelvio NTX.
Mikill aðdáandi ítölsku hjólanna
Ewan hefur alltaf haldið mikið upp á Moto Guzzi og heimsótti meðal annars verksmiðjurnar í Mandello del Lario á Ítalíu á leiðinni til Afríku í Long Way Down-ferðinni. Ewan á líka nokkur Moto Guzzi-mótorhjól sem hann notar nánast daglega þegar hann er heimavið. „Ég á nokkur Guzzi-hjól frá áttunda áratugnum og ég keypti Norge-hjól handa pabba til að nota þegar hann er í heimsókn en ég nota það hjól töluvert líka. Ég á meira segja Moto Guzzi Eldorado 1974 lögregluhjól með sírenum og öllu saman. Ég elska ekkert meira en að fara niður þegar börnin eru sofnuð og dunda í hjólunum mínum,“ sagði Ewan um mótorhjólaáhugann. Ekki hefur ennþá verið gefið út hvenær kappinn áætlar að leggja af stað í ferðina en góður tími fyrir slíka ferð er seint á haustin eins og þegar bræðurnir Einar og Sverrir Þorsteinssynir fóru sömu leið í fyrra. This email address is being protected from spambots. You need JavaScript enabled to view it.
